「你做乜唔報警」呢句話，我都有問過。我深感慚愧。我以為，叫佢打D歹徒呀，大聲叫唔好呀⋯⋯咁就得。原來對一D人黎講，正正係咁簡單都做唔到。佢係在大庭廣眾下被拖走、性侵犯，都唔敢高聲呼叫，因為太害羞了。佢被性侵犯後，連男朋友都唔敢講，更加唔好講話要報警了。如果你叫佢講多次，佢可能會自殺。
呢種心態好難明咩？乜你身邊冇女性被人性侵過咩？定你唔知咋？呢種文化我地有份造成架嘛，將女人視為被動地接受，唔需要尊重佢地既意願，「欲拒」一定係「還迎」….. 在華人文化入面，性更難以啟齒。而性侵者，又往往係信任既人。加上，你有眼睇，出來指證，會面對幾多質疑、幾多盤問，需要幾多勇氣。
而由 #MeToo 運動一開始，就係想支持一D飽受「潛規則」加害既女性。佢地在權力不平等既狀態下要被迫性朝貢以保住事業。任何人睇唔出呢種權力不平等，硬要話「男仔都好慘呀」真係give me a break. 你都識得罵成龍啦，成龍咪就係呢種濫用權力既表表者囉。依家講緊權力呀，係權力呀。
當你一邊將女星既乳溝稱作「事業線」，又認為富豪飯局只是一買一賣，一邊又聲稱「男女已經好平等唔使潛規則」，似乎十分自相矛盾喎。好啦我當你係正人君子，但你冇理由未見過一般男人掛？即係你自己係黃絲，你都唔會傻到話在香港，藍絲唔係一個普遍問題掛？你唔會話「香港已經好民主，唔需要改變」掛？
回到呂麗瑤，我覺得，佢正正係「不站在受害者位置」。不是所有人都要在被性侵後「楚楚可憐」、「後悔莫及」、「覺得自己好污糟」的。她也可以是一個戰士、一個捍衛者。她也可以選擇用她的力量，鼓勵其他人發聲，而不需要你的同情。
回到點解唔報警的問題，我們當然要鼓勵報警，但所謂「鼓勵報警」並唔係一句「你報警啦」就得的。而係要營造一個令受害人敢於報警的環境。在現行文化唔改變的情況下，問你「點解你唔報警呀」，同問周永新「點解你唔報警呀？」一樣只係假意。
下一篇文章，我想分析下點解男人之間對女人爭取乜乜物物咁恐懼。（待續）
