我有幾句說話想講，之後請大家提問。
首先希望咁多位香港市民。記得清楚我係至2016年起從來都一路秉持著一貫嘅政治立場 – —就係我哋香港人比北京封殺咗我哋嘅雙普選，我哋更加要檢視下，我哋而家嘅見證機制，到底有啲咩地方，係令到我地處處受到北京嘅控制。譬如話北京一路處處鉗制香港人嘅政治權利嘅《基本法》158條及159條。 我希望大家可以帶住呢個改變香港，見證嘅心，一齊為香港民主運動打開一條新嘅出路。
呢個政見呢，如果你有留意選舉主任嘅回覆，確認我哋由2016年到而家都係帶住同一個政治立場嘅。好啦，而家個問題係咩呢？就係搬龍門嘅唔係我、改變嘅唔係我 – —搬龍門嘅係特區政府以及佢背後嘅中聯辦以及北京。
我係2016年得到確認成為立法會候選議員並當選；我在2016年10月在全香港市民面前宣誓成為立法會議。跟住就算人大就著基本法104條嘅釋法，我嘅宣誓同我一路嘅政見，係並冇受到特區政府任何嘅司法質疑。
現任嘅立法會議員帶住佢由2016年開始向香港市民承諾嘅政綱，去參加一個地方村代表選舉（我住咗六年嘅元崗新村村代表選舉）居然係搬龍門到唔可以參加地方選舉！
大家如果有留意嗰份理由係話「懷疑」；或者佢覺得我嘅回應「隱含住」…如果選舉主任居然係連一個「確認我唔擁護基本法」都講唔出嘅，我覺得佢哋要同香港市民講清楚！到底喺幾時、點解、可以完全冇經過任何嘅公眾諮詢及立法程序，就將政治審查嘅門檻改變咗？
另外呢，我好想特別又同市民去講︰大家都要留意同警惕嘅，就係選舉主任今次藉呢封信件，隱含既政治邏輯就係「文革式」嘅「人人都要做政治警察」嘅邏輯。
即係咩意思呢？就係一個人係香港唔單止自己唔可以主張港獨，甚至你講到明冇主張而你亦唔贊成，但如果你冇反對人哋有呢個權，咁你就會被剝奪你嘅政治權利啦。呢個係違反基本法！我冇可能因為我要參選，所以呢，就剝奪其他人嘅言論自由！我冇理由就話喺某某集會入面，有人拎住張「港獨」你就要禁止佢，或者你要反對佢。我點解要反對佢呢？和平地去提倡港獨，喺我嘅認識，一定係言論自由在基本法保障範圍之內。
其實唔單止今次嘅事件可以睇到政府「人人都要做思想警察」呢個趨勢，即將討論嘅國歌法都係一樣嘅，在國旗法你要主動弄壞國旗才算違法；但在國歌法你要主動地表達肅立。呢個本來係你必須要主動地破壞才違法的行為，已經慢慢一步一步變成香港人要主動表態。
在我的例子，唔單止係要主動表態，重要主動否定別人的權利！在回答選舉主任的問題的過程中，我引用了基本法第104條的釋法以及陳浩天選舉呈請案，去提出選村代表的選舉主任，他並沒有權向我作政治審查。我用了相當篇幅去提出這個觀點。但今天在選舉止主任的回應是一點也沒有回應我這個觀點。我會向我的法律團隊商量，是不是要就這次無理的欺凌的、違反基本法的一個政治決定，尋求法律制裁。
最後因為呢次無理嘅DQ，我冇辦法參加元崗新村嘅居民選舉；冇辦法同元崗新村嘅村民一齊改善鄉村管理嘅問題；亦冇辦法同埋我綠色鄉村約章裏面嘅朋友，透過呢次參選提倡改革議會嘅制度。我向一班村民同埋我在綠色鄉村約章嘅朋友表示歉意。雖然我未必能夠喺呢個候選人嘅崗位為上，打呢場選戰，但我會繼續去幫助選民，繼續去推動改革。我亦會在立法會來提倡各項改革目前嘅鄉事嘅體制。
大家一定會問︰咁我嘅將來有點算呢﹖我嘅從政生涯係咪就此結束呢？我好想同市民大眾，同埋民主派嘅同路人講︰從來 進入議會參政係民主運動好重要嘅部分，但唔係唯一嘅部分。我喺呢條路上走咗唔少日子，喺未來都會尋求喺唔同嘅地方 – —首先當然係喺立法會崗位上同大家一齊打拼。未來亦都會喺唔同嘅地方為香港嘅未來出力。希望大家都好似我一樣，唔好放棄呢個地方，亦都唔好放棄進入所有嘅體制嘅可能性。我哋一定要把握每一個機會去同專制嘅政府角力，我哋加加埋埋先至有勝利嘅希望！
而家可以答大家嘅問題。
Like coin 請按5下！
